Дар интиқоли барқ маҳдудият нест

Душанбе, 13.06.2014. (АМИТ «Ховар», Мавҷуда Анварӣ).-Имрӯзҳо дар баъзе ВАО ва сомонаҳо гузоришҳои беасос пайдо шудааст, ки гӯё дар фасли тобистон дар баъзе минтақаҳои кишвар лимити барқ ҷорӣ шудааст. Дар робита ба ин сардори маркази матбуоти ширкати « Барқи Тоҷик» Нозир Ёдгорӣ ба хабарнигори АМИТ « Ховар » изҳор намуд, ки: «айни замон дар интиқоли барқ дар кишвар ягон маҳдудият мавҷуд нест. Мо ҳатто дар ин фасл ба хотири беҳ гардонидани вазъи молиявии ширкат берун аз ҷумҳурӣ барқ интиқол медиҳем. То ҳол бобати норасоӣ аз нерӯи барқ ягон корхонаи хурду бузург низ даъвое пешниҳод накардааст. Рост аст, ки ҳангоми таъмиру тармим дар ин ё он минтақа ва ноҳияҳо баъзан барқ хомӯш карда мешавад, вале дар чунин ҳолат масъулини ширкат ва корхонаҳои зертобеи он тавассути ВАО-и ҷумҳуриявӣ ва дохилӣ муштариёнро пешакӣ огоҳ месозад ».Ширкати «Барқи Тоҷик » аз тамоми муштариён-истифодабарандагони нерӯи барқ хоҳиш дорад, ки аз барқ эҳтиёткорона истифода баранд ва ҳаққи истифодаи нерӯи барқро пурра ва сари вақт пардохт намоянд.