Дар Рӯзи ваҳдати миллӣ чанд рӯз истироҳат дорем?

Душанбе, 24.06.2014. (АМИТ «Ховар», Кристина  Эрлих). —  27  июн  дар  Тоҷикистон 17 – умин  солгарди  Рӯзи  ягонагӣ ва ризоияти  миллӣ таҷлил  мешавад. Бинобар  таҷлили  иди  миллӣ,   27  июн   расман  рӯзи  истироҳат эълон  шудааст. 
Азбаски  27  июн  ба  рӯзи ҷумъаи  корӣ  рост  меояд, ин рӯз  мувофиқи  Қонун «Дар  бораи  рӯзҳои  ид  дар  Тоҷикистон»  ба  рӯзи  дигар  гузаронида  нашуда  ва сокинони  Тоҷикистон  як  рӯз —  27  июн  истироҳат  мекунанд.  28  ва  29 июн,  яъне  рӯзҳои  шанбею  якшанбе,  рӯзҳои тақвимии  истироҳат  ба  шумор  рафта, 30  июн  рӯзи  корӣ  аст. Дар  ин  бора  аз  Федератсияи  иттифоқҳои  касабаи  мустақили  Тоҷикистон  ба  мухбири  АМИТ «Ховар»  хабар  доданд.
Хотирнишон  месозем, ки соли  1997  дар  ин рӯз  дар  шаҳри  Маскав Президенти  Тоҷикистон  Эмомалӣ  Раҳмон  ва  роҳбари Иттиҳоди  мухолифини  тоҷик  Саид Абдуллоҳи  Нурӣ дар  ҳузури  нахустпрезиденти  Федератсияи  Русия  Борис  Елсин  Созишномаи  умумӣ  дар  бораи  истиқрори  сулҳу  ризоияти  миллӣ дар  Тоҷикистонро  имзо  намуда  буданд. Созишнома ба  ҷанги  шаҳрвандӣ, ки  боиси  талафи  беш  аз  100  ҳазор  нафар   гардид,  хотима  гузошт.
Дар  ин рӯз чун анъана  дар  саросари  кишвар  чорабиниҳои  оммавии  идона рӯи  кор  оварда, консертҳо  ва  ярмаркаю  ҷашнвораҳо  баргузор мегарданд.
Мутобиқи  Қонуни Ҷумҳурии  Тоҷикистон «Дар  бораи  рӯзҳои  ид»  аз  22  майи  соли  1998  ва дар  асоси  моддаи  83  Қонуни  меҳнати Ҷумҳурии  Тоҷикистон ,  ҳамчунин  мутобиқи  фармони Президенти Ҷумҳурии  Тоҷикистон  Рӯзи  ваҳдати  миллӣ —  27  июн  расман  рӯзи  ид ва  истироҳат  эълон  шудааст.