Даъвати Созмони умумиҷаҳонии тандурустӣ

Душанбе, 02.06.2014. (АМИТ «Ховар», Кристина  Эрлих). – Имрӯз бар  асари  истеъмоли тамоку ҳар 6  сония  як  нафар нобуд  мешавад. Созмони  умумиҷаҳонии  тандурустӣ  дар  Рӯзи  умумиҷаҳонии фориғ  аз  тамоку,  ки  ҳар  сол 31  май  таҷлил  мешавад,  кишварҳои ҷаҳонро даъват менамояд, ки андози  маснуоти тамокуро  баланд  бардорад. Мақсад  аз  ин  тадбир  аз  истеъмоли тамоку  даст  кашидани ҳаводорони он мебошад. Дар  натиҷаи  50  фоиз баланд  бардоштани  андози маснуоти тамоку теъдоди  истеъмолкунандлагони  он  баробари 49  миллион  нафар  коҳиш  ёфтааст. Дар  ин  бора  аз  Намояндагии Созмони  умумиҷаҳонии  тандурустӣ  дар  Тоҷикистон  ба  АМИТ «Ховар» хабар  доданд. 
Мувофиқи  маълумоти  ташкилоти  мазкур,  истеъмоли тамоку  боиси   хароҷоти  зиёди  оилаҳои  алоҳида ва  корхонаю  ҳукуматҳо гардида,  барои  муолиҷаи  бемориҳои  саратон ва дил  вобаста бо  истеъмоли тамоку  маблағе  зиёде  сарф  мешавад. 
Хотирнишон  месозем, ки  моҳи  декабри  соли  2010 дар ҷумҳурӣ  тамокукашӣ  дар  ҷойҳои  ҷамъиятӣ  манъ  шуда буд. Қонун «Дар  бораи  маҳдуд  сохтани  истифодаи  маснуоти тамоку»  фурӯши  тамоку  ва тамокукаширо  дар ҳудуди  мактабу  беморхонаҳо,  биноҳои ташкилоту  корхонаҳо ва  муассисаҳо,  сарфи назар  аз  шаклҳои  моликият,  дар  фурудгоҳҳо,   истгоҳҳо, осоишгоҳҳо, иншоотҳои  варзишию  фарҳангӣ  ва  нақлиёти  ҷамъиятӣ манъ  мекунад.