Даври 7-уми мусобиқаи лигаи олии футболи Тоҷикистон

    Душанбе, 18.06.2014. (АМИТ «Ховар», Ситораи Боймурод).- Бозии «Вахш»-и Қӯрғонтеппа бо «Регар-ТадАЗ», ки қаблан мавқуф гузошта шуда буд, дар даври ҳафтуми мусобиқаи қаҳрамонии лигаи олии футболи Тоҷикистон дирӯз дар варзишгоҳи «Пахтакор»-и шаҳри Қӯрғонтеппа баргузор шуд. 
 Тавре ки дар ин бора сомонаи Федератсияи футболи кишвар хабар додааст, дар ҷадвали мусобиқот “Истиқлол”-и Душанбе бо 22 имтиёз пешсаф мебошад ва ягона дастаест, ки то ҳоло бохт надорад. Бояд гуфт, ки «Истиқлол» сарфи назар аз натоиҷи бозиҳои даври 9-ум ва охирини марҳалаи аввали мусобиқот, ки рӯзи шанбеи 21-уми июн баргузор хоҳанд шуд, дар давраи якум барои рақибонаш дастнорас гаштааст.
 Барои ҷойҳои дувуму севум се даста — «Хуҷанд»-и Хуҷанд, «Парвоз»-и Бобоҷон Ғафуров ва «Хайр»-и Ваҳдат талош доранд. Дар ҳамин ҳол «Хуҷанд» бо 15 имтиёз дар ҷойи дувум аст. Дастаҳои «Хайр» ва «Парвоз» бо 13-имтиёзӣ мутаносибан дар зинаҳои севуму чорум ҷойгир шудаанд.