«Донаки сеҳрнок» дар Суғд

Душанбе,  4.06.2014. (АМИТ «Ховар», Ситораи Боймурод).- Имрӯз дар Театри давлатии лӯхтаки шаҳри Чкалов ба муносибати Рӯзи умумиҷаҳонии ҳимояи кӯдакон намоишномаи  “Донаки сеҳрнок” пешкаши толибилмони мактаби “Гулчини маърифат” — и шаҳри Хуҷанд гардонида шуд.
Ба гуфти масъулини театр то ба имрӯз дар як силсила шаҳру навоҳии вилоят, аз ҷумла Истиқлол, Спитамен, Ашт, Конибодом ва ҷамоати шаҳраки Палос намоишномаи “Донаки сеҳрнок” ба саҳна гузошта шудааст.
Инчунин масъулин иброз доштанд, ки кормандони театр дар баробари ба рӯи саҳна овардани намоишномаҳои наву диданӣ,  инчунин барои иштирок дар озмуни вилоятӣ, ки охири соли равон бахшида ба Рӯзи театри тоҷик дар вилояти Суғд баргузор мегардад, омодагии ҳамаҷониба мебинанд.
Ёдовар мешавем, ки  аз 15-ум то 22-юми апрели соли равон дар шаҳри Душанбе 4-умин Фестивали байналмиллалии театрҳои лӯхтак бо номи “Чодари хаёл” баргузор гардид, ки дар қатори беш аз 10 театрҳои кишварҳои ҷаҳон Театри давлатии лӯхтаки шаҳри Чкалов бо намоишномаи “Донаки сеҳрнок” иштирок намуд.