Густариши муносиботи Тоҷикистону Белорусия дар самти кишоварзӣ

Душанбе, 12.06.2014. (АМИТ «Ховар», Зарангези Латиф).- Тибқи даъвати Ҷумҳурии Беларусия ҳайати мутахассисони вазорати кишоварзии Тоҷикистон таҳти роҳбарии муовини вазири кишоварзӣ З.Зеваршоев аз 3-юм то 8-уми июни соли ҷорӣ барои иштирок дар Намоишгоҳи байналмилалии агросаноатии «Белагро-2014» ба Белорусия сафар намуданд.  Дар ҷараёни вохӯрии ҳайати гурӯҳи корӣ бо намояндагони ҶСШК «Промагролизинг» қайд шуд, ки корхонаи мазкур омода аст, ба харидории техника ва таҷхизоти кишоварзӣ, таҷҳизоти коркарди меваю сабзавот, коркарди хӯроки чорво ва амсоли инҳо бо Ҷумҳурии Тоҷикистон ҳамкорӣ намояд. Аз тарафи гурӯҳи корӣ номгӯи техника ва таҷхизоти лозима мувофиқи дархости хоҷагиҳо ба намояндагони ҶСШК «Промагролизинг» пешниҳод карда шуд. Ҳайати гурӯҳи корӣ дар кушодашавии Намоишгоҳи байналмилалии агросаноатии «Белагро-2014» иштирок намуда, баъди тамошои он ҳайати намоядагони корхонаи тракторсозии МТЗ ба гурӯҳи кории ҷумҳурии мо сехҳои истеҳсоли тракторҳо, васлкунӣ ва истеҳсоли қисмҳои эҳтиётиро нишон доданд. Зимни мулоқот бо намояндагони корхонаи мазкур пешниҳод карда шуд, ки дар доираи иҷрои Протоколи ҷаласаи 9-уми Коммисияи байниҳукуматӣ ҳамкориҳои дуҷонибаро дар рушди истеҳсоли техникаи кишоварзӣ, махсусан таъсиси корхонаи тракторбарорӣ дар Тоҷикистон боз ҳам пурзӯр менамоянд. Дар раванди вохуриҳо оид ба ҳамкориҳои тиҷоратӣ ва иқтисодӣ ва иҷрои бандҳои Протоколи ҷаласаи 9-уми Коммисияи байниҳукуматии Беларусия-Тоҷикистон гуфтушунидҳои судманд доир шуд. Ҳамзамон, дар доираи ҳамкориҳо бо Иттиҳодияи «Белсемена» барои харидории 7 навъи тухмии картошкаи истеҳсоли Белорусия ба миқдори 3 ҳазор тонна дархост пешниҳод гардид.Зимни вохӯрӣ бо муовини вазири саноати Ҷумҳурии Белорусия А. Огородников ҳамкориҳои самарабахш баҳри буньёд намудани корхонаи муштараки тракторсозии МТЗ 82.1 дар минтқаи озоди иқтисоди ноҳияи Данғара, корхонаи муштарак дар ноҳияи Ҳисор оид ба истеҳсоли ядакҳои кишоварзӣ байни ҶСК «Агротехсервис» — ноҳияи Ҳисор ва заводи «Бобруйск»-и Ҷумҳурии Белорус ия матраҳ гардид. Қайд кардан ба маврид аст, ки аз ҷониби гурӯҳи корӣ оид ба харидории чорво ва таҷҳизоти чорводорӣ, гирифтани қарзҳои дарозмуддат бо фоизҳои паст бо роҳбарияти Бонки рушди Белорусия гуфтушунид доир шуд. Оид ба харидории чорвои зоти сиёҳалаи голштейнӣ ба микдори 1000 сар ба роҳбарияти Бонк бизнес-нақша пешниҳод гардид.