Имзои созишномаҳои байни Ваҳдат ва Санкт — Петербург

Душанбе, 04.06.2014. (АМИТ «Ховар», Лайло  Тоирӣ). —  Раиси  шаҳри  Ваҳдат  Раҳмоналӣ  Амирзода   зимни  сафараш  дар  шаҳри Санкт — Петербург  масоили  ҳамкорӣ дар  бахши  муҳоҷиратро  бо  роҳбарияти  Раёсати  хадамоти федералии  муҳоҷирати   Русия  дар   шаҳри Санкт — Петербург ва  вилояти  Ленинград  муҳокима  намуд. 
Дар  ҷараёни  мулоқот   зарурати ба таври  муташаккилона  ҷамъ  намудани  муҳоҷирони  меҳнатӣ  аз  ҷумлаи  шаҳрвандони  Тоҷикистон  зикр  гардид. 
Назар  ба  хабари  котиби  матбуоти  Намояндагии Хадамоти  муҳоҷирати  ҶТ  дар  ФР  Иброҳим  Аҳмадов,  дар  шаҳри  Санкт — Петербург ҳамчунин ҳамоиши  соҳибкорони  шаҳрҳои Санкт — Петербург ва  Ваҳдат  баргузор  гардида,  дар  ҷараёни он  масоили  истифодаи имкониятҳои мавҷуда ва тарҳрезии лоиҳаҳои нави  муштарак  мавриди  муҳокима қарор гирифтанд. Аз  рӯи  натиҷаи ҳамоиш бархе  созишномаҳои  ҳамкорӣ  имзо шуданд. Намояндагони  соҳибкорон  ва  аҳли  тиҷорат  тасмим  гирифтанд, ки   корхонаю  муассисаҳои  муштараки бахши  истеҳсолот,  сохтмон,  нақлиёт  ва  сайёҳиро   таъсис  диҳанд.