Иштироки М. Убайдуллоев дар ҷаласаи Сенати Фаронса

Душанбе, 12.06.2014.(АМИТ «Ховар», Марзия Саидзода).- Тавсеаи равобити байнипарлумонии Тоҷикистону Фаронса дар вохӯрии Маҳмадсаид Убайдуллоев- раиси Маҷлиси миллии Маҷлиси Олии Ҷумҳурии Тоҷикистон бо ҳайати гуруҳи дӯстӣ ва ҳамкории Фаронса бо кишварҳои Осиёи Марказӣ бо роҳбарии сенатор Андре Дюле ва роҳбари гуруҳи дӯстии Фаронса — Тоҷикистон Ив Поззо ди Борго 11 июн дар Париж баррасӣ шуд. Дар мулоқот мусоҳибон доир ба густариши ҳамкориҳо байни гуруҳҳои дӯстӣ ва тақвияти робитаҳо дар бахшҳои иқтисодиёт, маориф, тандурустӣ, фарҳанг ва туризм табодули назар намуданд. Маҳмадсаид Убайдуллоев ба саволҳои сенаторони Фаронса оид ба вазъи минтақа, робита ва ҳамкории кишвари мо бо давлатҳои хориҷи дуру наздик, имкониятҳо барои ҷалби сармояи хориҷӣ ва шароиту имтиёзҳое, ки барои сармоягузорон ва доираи васеи соҳибкорон дар Тоҷикистон фароҳам оварда шудааст, посухҳои мукаммал дод.Ҳамзамон нимаи дуюми 11 июн Маҳмадсаид Убайдуллоев -раиси Маҷлиси миллии Маҷлиси Олии Ҷумҳурии Тоҷикистон дар ҷаласаи Сенати Фаронса ба ҳайси меҳмони олиқадр ширкат варзид. Раиси Маҷлиси миллии Маҷлиси Олии Ҷумҳурии Тоҷикистонро Президенти Сенати Фаронса Жан-Пер Бел ба сенаторони фаронсавӣ муарифӣ намуд.