Истифодаи ғайриқонунии замин ба ҷавобгарии ҷиноятӣ мекашад

Душанбе, 5.06.2014. (АМИТ «Ховар», Муқаддас Темурзода). -Тавре ки маркази матбуоти ВКД ҶТ хабар медиҳад, зимни гузаронидани чорабиниҳои фаврӣ-ҷустуҷӯӣ, аз ҷониби кормандони милитсия директори Корхонаи воҳиди давлатии №10 дар шаҳри Ваҳдат, Раҳмоналӣ Боев, соли таваллудаш 1949, истиқоматкунандаи шаҳри Душанбе бо гумони хариду фурӯши ғайриқонунии замин дастгир шуд. Сарчашма хабар медиҳад, ки номбурда моҳи майи соли ҷорӣ ғайриқонунӣ аз ҳудуди корхонаи мазкур барои сохтмони манзили истиқоматӣ ба шаҳрвандон, Маҳмудов Шералӣ, соли таваллудаш 1961, сокини ноҳияи Ёвон ва Ширинзода Ғайратшо, соли таваллудаш 1988, сокини шаҳри Ваҳдат ба маблағи 4000 доллари амрикоӣ 1,5 сотихӣ заминро бе ягон ҳуҷҷат тақсим намудааст. Нисбат ба далели мазкур парвандаи ҷиноӣ оғоз гардида, тафтиш идома дорад