Истироҳат дар лагерҳо барои кӣ ройгон аст?

Душанбе, 09.06.2014. (АМИТ «Ховар», Мавҷуда Анварӣ). -Аз 12 июни соли ҷорӣ истироҳатгоҳҳои тобистонаи кишвар дари худро ба рӯйи кӯдакону наврасон боз мекунанд. Бо мақсади беҳтар фаро гирифтани мактабиён бо фароғати фаъол дар асоси Қарори Ҳукумати мамлакат дар назди Федератсияи иттифоқҳои касабаи мустақили кишвар ситоди махсуси «Тобистон — 2014» таъсис ёфт. 
Ба ситод роҳбарону масъулони ниҳодҳои масъули бахши истироҳати  таътилии кӯдакону наврасон дохиланд. Мувофиқи нақшаи пешакӣ, имсол дар ҷумҳурӣ 4227 лагери тобистонӣ, аз ҷумла 3328 наздимактабии рӯзона, 154 беруназшаҳрии шабонарӯзӣ, 109 варзишию тандурустӣ, 383 истироҳатгоҳ барои хонандагони синфҳои боло, 315 лагери меҳнату фароғат амал мекунанд ва дар онҳо беш аз 358 ҳазор хонанда истироҳат хоҳанд кард. 
Истироҳат дар лагерҳо барои кӯдакону наврасони болаёқат, аълохон ва аз оилаҳои камбизоат ройгон аст.