Кашфи коргоҳи нӯшокиҳои ғайристандартӣ

Душанбе, 05.06.2014. (АМИТ «Ховар», Бекназари Абӯбакр). — Ҷиҳати ҳимояи бозори истеъмолии мамлакат аз воридоти маҳсулоти пастсифату хатарнок мутахассисони Агентии «Тоҷикстандарт» дар натиҷаи гузаронидани санҷишҳо аз аввали соли 2014 то имрӯз зиёда аз 400 тонна маҳсулоти гуногуни муҳлати истеъмолашон гузаштаро ошкор намуданд.
Дар Агентии «Тоҷикстандарт» мутахассисони соҳа ба мухбири АМИТ «Ховар» гуфтанд, ки дар фасли тобистон талабот ба нӯшокиҳои ташнагишикан зиёд мегардад. Вобаста ба талаботи бозор корхонаҳои истеҳсоли обҳои ташнагишикан маҳсулотҳои гуногуни худро ба мардум пешкаш мекунанд. Дар байни истеҳсолкунандагон соҳибкороне ҳастанд, ки ба беэътиноӣ роҳ дода, талаботи қонунҳоро вайрон мекунанд ва маҳсулоти пастсифату ба талаботи стандарт ҷавобгӯ набударо дар таҷҳизоти худсохт,  бе иҷозати мақомоти дахлдор истеҳсол мекунанд. 
Мутахассисони Маркази «Тоҷикстандарт» дар вилояти Суғд зимни гузаронидани санҷиш дар нуқтаҳои фурӯши бозори ҶДММ «Гулистон»-и шаҳри Хуҷанд ба миқдори калон панҷ намуд нӯшокии худсохти ташнагишикани «Оби газнок», «Тасним», «Яблоко», «Лимонад», «Вишня», «Кола» ва «Персик»-ро дар зарфҳои полиэтелинии  ғунҷоишаш 1 литра ошкор намуданд, ки хилофи меъёрҳои стандартӣ буда, истеъмоли он ба саломатии инсон зарар дорад.  
Идомаи санҷиши кормандони Маркази «Тоҷикстандарт» дар вилояти Суғд нишон дод, ки ин маҳсулоти қалбакию пастсифат дар коргоҳи хурди соҳибкори инфиродӣ Шӯҳрат Акзамов бе риояи талаботи муқаррарии маводи хӯрокӣ, хилофи меъёрҳои стандартӣ дар шароити ғайрисанитарӣ истеҳсол шудааст ва ин ба ном коргоҳи хурди истеҳсолии соҳибкори инфиродӣ дар минтақаи саноатии шаҳри Хуҷанд дар бинои сохтмонаш нотамом воқеъ аст.
Азназаргузаронӣ нишон дод, ки коргоҳ ба ягон талаботи меъёрии истеҳсоли маводи хӯрокӣ ҷавобгӯ набуда, таҷҳизоти обрезӣ, обтозакунӣ, зарфҳои калони нигоҳдории об, таҷҳизоти сарпӯшкунӣ ва дигар лавозимот бе риояи талаботи зарурӣ насб шуда, истифодаи таҷҳизот ва ҳамаи корҳо дастӣ иҷро мегарданд.  Шароити нигоҳдории маҳсулот ба талаботи санитарӣ-эпидемиологӣ ҷавобгӯ намебошад.
Аммо соҳибкор ин қабил маҳсулоти қалбакиро бе ягон ташхис, бе сертификати мутобиқат ва бе иҷозат дар нуқтаҳои савдо ба фурӯш баровардааст.
Миқдори нӯшокиҳои ташнагишикани дар бозори «Гулистон» ошкоршуда 4568 ададро ташкил дода, номгӯи нӯшокиҳои ташнагишикани «Тасним», «Яблоко», «Лимонад», «Вишня», «Кола» ва «Персик» аз рӯи тамғақоғаз, яъне нишон дода нашудани санаи истеҳсол, мавҷудияти моддаҳо ва  бӯйҳои бегона ба талаботи стандартҳои байнидавлатии 28188-89 мутобиқ намебошад. Ҳамаи маҳсулот хилофи талаботи стандартҳои байнидавлатӣ истеҳсол шудааст.