М. Убайдуллоев Жан-Пер Белро ба Тоҷикистон даъват кард
Душанбе, 12.06.2014(АМИТ «Ховар», Марзия Саидзода).- Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев дар доираи сафари расмии худ ба Фаронса ба Сенати ин кишвар ташриф оварда, бо Жан-Пер Бел -Президенти Сенати Фаронса мулоқот анҷом дод. Маҳмадсаид Убайдуллоев зимни мулоқот бо ҳамтои фаронсавиаш ба сатҳи муносибатҳои дӯстона ва ҳамкориҳои байнипарлумонии Тоҷикистону Фаронса, ки тӯли солҳои охир густариш меёбанд, баҳои баланд дода, дурнамои онро нек арзёбӣ намуд. Мавсуф афзуд, ки сафари нахустини расмии ҳайати парлумонии Тоҷикистон ба Фаронса дар тавсеаи равобити байнипарлумонӣ ва ҳамкориҳои мутақобилан судманди ҳар ду кишвар саҳифаи навро боз хоҳад кард. Бо дахли ҳамкориҳои дуҷонибаи иқтисодию тиҷоратӣ байни Тоҷикистону Фаронса М. Убайдуллоев аз сифати корҳои анҷомдодаи ширкати фаронсавии «Итрон Франс» дар таҳвили ҳисобкунанкҳои обӣ барои КВД «Обу корези Душанбе» изҳори қаноатмандӣ намуд. Ҳамзамон, дар мулоқот масоили марбут ба бунёди терминали нави замонавӣ дар «Фурудгоҳи байналмилалии Душанбе», ки аз ҷониби Фаронса сохта мешавад ва он моҳи сентябри соли равон мавриди баҳрабардорӣ қарор хоҳад гирифт, матраҳ шуд. М. Убайдуллоев зикр кард, ки Тоҷикистон дорои захираҳои бузурги энергетикӣ ва канданиҳои табиист ва дар ин самт ҷиҳати сохтмон ва ба кор даровардани корхонаҳои муштарак бо ҷалби сармоягузорони хориҷӣ, хусусан фаронсавӣ шароити мусоид фароҳам оварда шудааст. Мусоҳибон ҳамзамон дар ҷараёни мулоқот доир ба авзои сиёсии минтақа ва ҷаҳон табодули назар намуданд. Раиси палатаи болоии Парлумони Тоҷикистон таъкид кард, ки бо назардошти вазъи ноороми сиёсӣ дар Афғонистон, ки Тоҷикистон бо он ҳамҷавор аст ва беш аз 1400 километр марз дорад, андешидани тадбирҳои дастаҷамъона ҷиҳати ҷилавгирӣ аз интиқоли ғайриқонунии маводи мухаддир, мубориза алайҳи терроризм, экстремизм, ҷинояткории муташаккилона ва дигар зуҳуроти номатлуб саривақтист. Жан-Пер Бел -Президенти Сенати Фаронса пешниҳодҳои ироанамудаи ҳамтои тоҷикашро ҷонибдорӣ намуда, гуфт, ки барои рушди минбаъдаи ҳамкориҳои мутақобилан судманди Тоҷикистону Фаронса дар бахшҳои мухталиф тавассути дипломатияи парламентӣ тадбирҳои судманд андешида хоҳанд шуд. «Мутмаинам, ки дар ин самт нақши гуруҳҳои дӯстии парлумонӣ беш аз пеш муассиртар мегардад», таъкид кард Президенти Сенати Фаронса.Маҳмадсаид Убайдулоев дар фарҷоми мулоқот аз ҳамтои фаронсавиаш Жан-Пер Бел даъват ба амал овард, ки дар фурсатҳои барояш муносиб ба Тоҷикистон бо сафари расмӣ ташриф орад. Даъват бо қаноатмандӣ пазируфта шуд.








Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд






