Машварати кишварҳои узви СҲШ

Душанбе, 05.06.2014. (АМИТ «Ховар», Мавҷуда Анварӣ). — Имрӯз дар Агентии назорати маводи нашъаовари назди Президенти ҶТ ҷаласаи навбатии гурӯҳи кории коршиносон оид ба фаъолияти ҳифзи ҳуқуқ ва пешгирии ҷиноятҳои вобаста ба маводи нашъаовар-машварати роҳбарони мақомоти салоҳиятдори кишварҳои узви Созмони Ҳамкории Шанхай, ки салоҳияти бурдани мубориза бар зидди муомилоти ғайриқонунии маводи нашъаоварро дорад, баргузор гардид.
Дар ҷаласа масъалаҳои мубодилаи иттилоот, оид ба ҳамкорӣ дар соҳаи мубориза бар зидди муомилоти ғайриқонунии воситаҳои нашъадор, моддаҳои психотропӣ ва прекурсорҳо, гузаронидани чорабиниҳои муштарак, пешгирии қочоқи маводи нашъовари синтетикӣ ва муқовимат ба ворид намудани маводи кимиёвӣ, ки барои истеҳсоли маводи нашъаовар истифода бурда мешаванд, мавриди баррасӣ қарор гирифтанд.
Дар интиҳо санади ниҳоии ҷаласаи гурӯҳи кории коршиносон аз ҷумҳуриҳои Тоҷикистон, Қазоқистон, Қирғизистон, Ӯзбекистон, Ҷумҳурии Мардумии Чин, Федератсияи Русия ба имзо расид.