Моҳи Рамазон омад аз сӯи биҳишт….
Душанбе, 19.06.2014. (АМИТ «Ховар», Мавҷуда Анварӣ).-Тибқи ҳисоби илмӣ ва ҳисоби эҳҷаззабуд моҳи шарифи Рамазон рӯзи шанбе -28 июни соли 2014 оғоз меёбад. Дар ин хусус дирӯз 18 июн дар ҷаласаи Шӯрои уламои ҷумҳурӣ, ки таҳти раёсати раиси Шӯрои уламои Маркази исломии Тоҷикистон Сайидмукаррам Абдулқодирзода бо иштироки имомхатибон доир гардид, қарор қабул шуд.
Ҳоҷӣ Неъматуллоҳ, котиби масъули Маркази исломии Тоҷикистон дар суҳбат ба хабарнигори АМИТ «Ховар» гуфт, ки дар ҷаласа ҳамзамон миқдори нисоб муайян ва тасдиқ шуд, ки он ба 10 ҳазору 875 сомонӣ баробар аст. Яъне, афроде, ки ин миқдор маблағ доранд, бояд дар ҳаҷми 272 сомонӣ закот диҳанд. Ҳаҷми садақаи фитр сари ҳар нафари афроди хона 4 сомониро ташкил дод.
Моҳи Рамазон яке аз моҳҳои шариф барои мусулмонон маҳсуб ёфта, тамоми мусулмонони ҷаҳон дар ин моҳи муборак рӯза медоранд, бештар ба тоату ибодат ва қироати Қуръони азимушшаън машғул шуда, кинаро аз дилҳо дур сохта, ба эҳтиёҷмандон, маъюбон ва ятимону бепарасторон кӯмак мерасонанд.