Муҳокимаи рушди тиҷорату фоида дар Афғонистон

Душанбе, 24.06.2014. (АМИТ «Ховар»). – 23  июн  дар  шаҳри  Душанбе форуми  соҳибкорон  аз  рӯи  масъалаи  рушди  савдо  ва    фоида дар  Афғонистон  баргузор  гардид. 
Мувофиқи   хабари Сафорати  ИМА  дар  ҶТ,  соҳибкорони тоҷик  якҷоя  бо   соҳибкорони  Афғонистон,  Қирғизистон  ва  Покистон гуфтушунид  доир  намуда, масоили  марбут ба  имкониятҳои  сармоягузорӣ  дар  чор  кишвари  минтақаро  мавриди  муҳокима  қарор  медиҳанд.
Ин  чорабинӣ бо  ибтикори  USAID   пайваста  бо  ҳамкорӣ  бо  палатаҳои  савдо  ва  саноати  Тоҷикистон,  Афғонистон,  Қирғизистон, Палатаи  муттаҳидаи савдо  ва  саноати  Покистону  Афғонистон,  ҳамчунин Барномаи  рушди  СММ  ва Лоиҳаи «Мусоидат  ба  рушди тиҷорат» роҳандозӣ   шудааст. 
«Тайи бист  соли охир  Осиёи  Марказӣ  ба  яке  аз  минтақаҳои бо  суръати баланд  тараққикунанда  мубаддал  гардид, ки дар  он  идомаи  рушди  устувори  иқтисодиёт  ба  назар  мерасад. Дар Осиёи  Марказию  Ҷанубӣ имкониятҳои истифоданашудаи  бузурги тиҷорат арзи  вуҷуд дорад,  ки ҳамаи  кишварҳои  минтақа  метавонад аз  онҳо  бархӯрдор  бошанд.  Ин  вазъият  барои  ҳамаи  ҷонибҳои  манфиатдор  муфид  аст», — зикр  намуд,  сафири  ИМА  дар  Тоҷикистон  Сюзен Эллиотт.
Иштирокдорони  форум  дар  баробари  мулоқотҳо, аз   чор  корхонаи  шаҳри  Душанбе низ боздид  намуда, бо  вазъи  истеҳсоли  маводи  сохтмонӣ, маҳсулоти саноати  хӯрокворӣ  ва  нассоҷӣ  шинос  мешаванд.