Муаррифии Тоҷикистон дар ҷомеаи ҷаҳонӣ

Душанбе, 4.06.2014. (АМИТ «Ховар», Зарангези Латиф).-Вобаста ба иҷрои Қарори Ҳукумати Ҷумҳурии Тоҷикистон “Дар бораи нақшаи чорабиниҳо оид ба беҳтар намудани фазои сармоягузорӣ дар бахши туризм дар Ҷумҳурии Тоҷикистон ва татбиқи босамари  «Барномаи давлатии рушди туризм дар Ҷумҳурии Тоҷикистон дар давраи солҳои 2010-2014» , ҳукумати кишвар бо таваҷҷӯҳ ба иқтидор, хусусиятҳои табиӣ ва таърихию фарҳангии кишварамон дар қатори дигар самтҳо, соҳаи туризмро ҳамчун самти афзалиятноки рушди иктисодиёти миллӣ эълон кардааст.
Бо мақсади рушди туризми воридотӣ, ҷалби ҷомеа ба мероси фарҳангиву таърихӣ, баланд бардоштани сатҳи хизматрасонӣ, омода намудани пешхизматҳои сатҳи ҷаҳонӣ, ҳамчунин ширкати фаъол дар чорабиниҳои бонуфуз ва бад-ин минвол муаррифии Тоҷикистон, Кумитаи ҷавонон, варзиш ва сайёҳӣ ҳамкориро бо меҳмонхонаи «Серена» ба роҳ монда, ҷонибҳо дар ин робита  изҳор доштанд, ки барои ҳамкориҳо ҳамеша ҳавасманданд ва бобати вусъати робитаҳо талош хоҳанд кард.