Мубориза бо фасод- вазифаи ҳар фард

    Душанбе, 20.06.2014. (АМИТ «Ховар», Раъно Нусратуллозода).- Дирӯз дар Хадамоти гумруки назди Ҳукумати Ҷумҳурии Тоҷикистон бо иштироки намояндагони мақомоти гумрук ва намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон вохӯрӣ доир гардид.
Тавре ки аз Хадамоти гумрук иттилоъ доданд, вохӯрӣ мавзӯи зуҳуроти коррупсионӣ ва мубориза бо он дар кишварро дар бар мегирифт. Намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Шодком Турсунов оид ба мубориза бо ин зуҳуроти номатлуб зикр намуд, ки таъсири коррупсия дар раванди рушди иҷтимоиву иқтисодии ҷомеа ва пешрафти дигар соҳаҳои ҳаётан муҳим таъсири калон дорад ва муборизаи дастаҷамъона дар ин самт вазифаи ҳар фард, бахусус кормандони қудратӣ буда, баҳри пешгирии фасод дар ҷомеа аз тамоми имконоти мавҷуда истифода бояд бурд.
Муовини сардори Хадамоти гумрук Тоҳирҷон Нуров изҳор дошт, ки яке аз омилҳои асосии пешгирии ин зуҳуроти номатлуб маҳз бурдани корҳои фаҳмондадиҳӣ миёни аҳли ҷамоат ба шумор меравад, зеро барои содир шудани ҷиноятҳои коррупсионӣ дар бисёр мавридҳо худи шаҳрвандон шароит муҳайё менамоянд.