Мулоқоти Қоҳир Расулзода Янош Ҳерман

Душанбе, 9.06.2014. (АМИТ «Ховар», Зарангези Латиф).- Имрўз Сарвазири мамлакат Қоҳир Расулзода бо намояндаи махсуси Иттиҳоди Аврупо оид ба  Осиёи Марказӣ  Янош  Херман мулоқот кард.
Дар мулоқот ба раванди ҳамкориҳои Тоҷикистон  бо Иттиҳоди Аврупо дар панҷ соли охир  баҳои баланд дода шуда, нақши намояндагии Иттиҳоди Аврупо дар Тоҷикистон дар муколама ва таҳкими робитаҳои дуҷониба  назаррас арзёбӣ гардид.
Ҷонибҳо доир ба дурнамои Стратегияи нави Иттиҳоди Аврупо оид ба Осиёи Марказӣ барои солҳои 2014-2020 табодули афкор карда,  изҳори боварӣ намуданд, ки дар доираи татбиқи стратегияи мазкур  ҳамкориҳои дуҷонибаи Тоҷикистон бо Иттиҳоди Аврупо ва кишварҳои аъзои он дар соҳаҳои иқтисоду тиҷорат, энергетика, истифодаи захираҳои об дар минтақа, нақлиёт, ҳифзи муҳити зист ва соҳаҳои иҷтимоӣ ҳарчӣ бештар таҳким меёбанд.
Дар мулоқот, ҳамзамон масоили дигари мавриди тавваҷўҳи ҷонибҳо, аз ҷумла ҳамдастӣ дар таъмини амнияту субот дар минтақа, ҳифзи сарҳади  давлатӣ ва мубориза бар зидди гардиши ғайриқонунии маводи мухаддир  баррасӣ шуд.