Мулоқоти Ш.Раҳимзода бо Зирор Аҳмад Усмонӣ
Душанбе, 06.06.2014. (АМИТ «Ховар», Фарзона Достонзода). — 5 июн дар шаҳри Душанбе мулоқоти вазири рушди иқтисод ва савдо Шариф Раҳимзода бо вазири корҳои хориҷии Ҷумҳурии Исломии Афғонистон Зирор Аҳмад Усмонӣ баргузор гардид.
Тавре ки аз Вазорати рушди иқтисод ва савдои кишвар ба АМИТ «Ховар» хабар доданд, Шариф Раҳимзода ба меҳмон барои пуштибонӣ ва ҳамкории мутақобилан муфид дар бахшҳои мухталифи иқтисоди кишвар изҳори миннатдорӣ кард.
Зирор Аҳмад Усмонӣ дар навбати худ аз шароити мусоиди сармоягузорӣ дар Тоҷикистон изҳори қаноатмандӣ карда, иброз дошт, ки Афғонистон ба татбиқи лоиҳаҳои сармоягузорӣ бо ширкатҳои калонтарини Тоҷикистон омода аст.
Ҷониби Афғонистон ҳамчунин хоҳиши худро дар амри таҳкими минбаъдаи ҳамкории мутақобилан муфид дар бахшҳои инфрасохтор, сохтмон, нақлиёт ва энергетика иброз дошт.