Нахустин Анҷумани миллии табибони Тоҷикистон

Душанбе, 25.06.2014. (АМИТ «Ховар», Лайло Тоирӣ).- Дар шаҳри Душанбе Анҷумани нахустини миллии табибони Ҷумҳурии Тоҷикистон доир гардид. Дар кори он муовини Сарвазири Ҷумҳурии Тоҷикистон Марҳабо Ҷабборӣ, раиси кумита оид ба масъалаҳои иҷтимоӣ, оила ва ҳифзи саломатии Маҷлиси намояндагони Маҷлиси Олии Ҷумҳурии Тоҷикистон Хайриниссо Юсуфӣ, вазири тандурустӣ ва ҳифзи иҷтимоии аҳолии Ҷумҳурии Тоҷикистон Нусратулло Салимзода, намояндагони соҳа аз тамоми шаҳру навоҳии кишвар, устодону собиқадорони тибби тоҷик, олимону профессорон ва шарикон оид ба рушд ширкат варзиданд.Вазири тандурустӣ ва ҳифзи иҷтимоии Ҷумҳурии Тоҷикистон Н. Салимзода гуфт, ки дастовардҳои соҳаи тандурустии кишвар дар тӯли 23 соли истиқлолияти кишвар хеле назаррасанд. Зикр шуд, ки соҳаи тандурустии кишвар тайи солҳои охир ба дастовардҳои назаррас ноил гардид, зеро соҳаи ҳифзи солимӣ ва иҷтимоии аҳолӣ — яке аз самтҳои афзалиятноки сиёсат ва рушди иқтисодиёти давлат мебошад Таҳлили фаъолияти соҳаи тандурустии кишвар вобаста ба татбиқи ислоҳоти соҳа, дастрас ва беҳтар кардани сатҳи хизматрасониҳои тиббию санитарӣ ба аҳолӣ, аз ҷумла барои вусъат додани татбиқи тибби оилавӣ, дастрасии усулҳои муосири ташхису табобат, рушди тибби хусусӣ нишон медиҳад, ки дар солҳои охир корҳои зиёди натиҷабахш ба анҷом расидаанд. Дар баробари татбиқи як силсила ҳуҷҷатҳои стратегӣ бо оғози марҳилаи нави рушди соҳа зарурати ҷиддӣ барои таҳияи дигар ҳуҷҷатҳои стратегии соҳа ба миён омадааст. Лоиҳаи Кодекси ахлоқи табиби Ҷумҳурии Тоҷикистон, ки бо ҳидояти бевоситаи Президенти мамлакат таҳия гардидааст, яке аз чунин ҳуҷҷатҳои муҳим ва натиҷабахш хоҳад гардид. Лоиҳаи кодекси мазкурро вакилони анҷуман мавриди баррасӣ қарор дода, онро ҳуҷҷати саривақтӣ ва мувофиқи мақсад шуморида, якдилона қабули ин кодексро ҷонибдорӣ намуданд.