Нашри махсуси «Номаи Донишгоҳ»

Душанбе, 25.06.2014. (АМИТ «Ховар», Раъно Нусратуллозода).-28-29 июни соли равон дар Донишгоҳи давлатии Хуҷанд ба номи Б.Ғафуров таҳти унвони «Муаммоҳои математикаи муосир ва усули таълими он» бахшида ба 20- солагии Сарқонуни Ҷумҳурии Тоҷикистон ва 60- солагии олимони варзидаи илми математика Абулқосим Муҳсинов, Акбар Нозимов, Саттор Байзоев, Дилбар Осимова ва Қамариддин Тӯхлиев конфронси байналхалқӣ баргузор мегардад.
Тавре ки аз кумитаи тадорукоти ин ҳамоиши байналхалқӣ иттилоъ доданд, ба ин муносибат дар нашри махсуси маҷаллаи илмии донишгоҳ «Номаи Донишгоҳ» дар равияи илмҳои дақиқ дар ҳаҷми 2 қисм маҷмӯи мақолоти конфронс ба нашр расидааст. Муаллифони мақолаҳо роҷеъ ба муаммоҳои мубрами математика ва роҳҳои ҳалли он, аз ҷумла дар бораи таҳсилоти фосилавӣ ва самаранокии он дар раванди таҳсилот, истифодаи технологии навин дар таълими фанҳои мактабӣ, мушкилоти омӯзиши дастовардҳои илмӣ ва инноватсионӣ дар шароити ҷаҳонишавӣ ва инкишофи тафаккури хонандагон, нақши таълими информатика дар ташаккули афкори хонандагони синни хурди мактабӣ, рушди технологияи иттилоотӣ-коммуникатсионӣ дар даврони Истиқлолият, омӯзиши муодилаи хаттӣ дар таълими математикаи синфҳои ибтидоӣ, истифодаи усулҳои фаъоли таълим дар дарси технология андешаҳои илмии хешро нигоштаанд.Гуфта мешавад, ки дар конфронси байналхалқӣ олимони варзидаи дохиливу хориҷӣ, аз ҷумла Русия, Қазоқистон, Қирғизистон ва Ӯзбекистон иштирок ва маърӯза менамоянд.