Натиҷагирии ВКД аз мусобиқаи волейбол

Душанбе, 13.06.2014. (АМИТ «Ховар», Мавҷуда Анварӣ).-11 июни соли равон дар толори варзишии «Динамо»-и ВКД мусобиқаи варзишӣ аз рӯи намуди волейбол байни дастаҳои ҷузъу томҳои мақомоти корҳои дохилӣ, ки бахшида ба «Рӯзи ҷавонон» оғоз гардида, то инҷониб идома дошт, ҷамъбаст гардид.Дар ин бозиҳо 18 даста иштирок намуда, ба қисми ниҳоӣ чор даста роҳ ёфтанд. Дастаи Раёсати ВКД дар нақлиёт ба дастаи Академия ғолиб омада, дастаи қисми минтақавии Кӯлоб бошад дастаи Хадамоти давлатии Муҳофизаро мағлуб сохт.Аз рӯи натиҷаи бозиҳо варзишгарони беҳтарин низ муайян шуданд, аз ҷумла муҳофизатгари беҳтарин Амиршо Ғарибшоев аз дастаи Раёсати ВКД дар нақлиёт, ҳамлагари беҳтарин Шароф Сайдалиев аз дастаи қисми минтақавии гурӯҳи ноҳияҳои Кӯлоб ва бозингари беҳтарин Муҳиб Латипов аз дастаи Академияи ВКД дониста шуданд.Дар охир, ғолибон бо Ҷом, медал, «Ифтихорнома» ва «Сипоснома» сарфароз гардонида шуданд.