«Пиромуни Рӯдакӣ ва рӯдакишиносон»

Душанбе, 26.06.2014 (АМИТ «Ховар»).- Дар интишороти «Илм ва фарҳанги Эрон» китоби нави адабиётшиноси тоҷик Мирзо Муллоаҳмадов таҳти унвони «Пиромуни Рӯдакӣ ва рӯдакишиносон» ба теъдоди 2000 нусха нашр гардид. Ин даҳумин китоби муаллиф аст, ки дар Эрон ба табъ расидааст. Қаблан китобҳои ӯ «Ёди ёри меҳрубон», «Хубони порсигӯй», «Ҷанг ва сулҳ дар Шоҳнома», «Рӯдакӣ ва суханварони ҳамрӯзгори ӯ», «Андарзномаи Рӯдакӣ», «Садои Осиё»-и Мирзо Турсунзода» ва амсоли инҳо дар нашриётҳои гуногуни ин кишвари ҳамзабон ба табъ расидаанд.Китоби «Пиромуни Рӯдакӣ ва рӯдакишиносон» аз ду бахш иборат буда, бахши аввали он дастоварду бозёфтҳои муаллифро дар масоили шинохти аҳволу осори Рӯдакӣ дар бар мегирад. Дар бахши дуввуми китоб «Симои рӯдакишиносон» саҳми донишмандони маъруф С.Айнӣ, С.Нафисӣ, Маликушшуаро Баҳор, Б.Фурӯзонфар, Е.Э.Бертелс, А.Мирзоев, И.С.Брагинский, А.Н.Болдерев, А.Мухторов, А.Афсаҳзод ва монади онҳо дар таҳқиқи аҳвол ва осори устод Рӯдакӣ нишон дода шудааст. Китоб саҳми арзандаи муаллиф ва интишороти мазкур дар таҳкими робитаҳои илмии ду кишвари ҳамзабон буда, дар таҳқиқ ва тарғиби аҳволу осори бунёдгузори адабиёти форсу тоҷик устод Абуабдуллоҳи Рӯдакӣ хеле судманд аст. Латиф Латифӣ