Раиси нави Академияи рассомӣ интихоб шуд

Душанбе, 05.06.2014. (АМИТ «Ховар», Раъно  Нусратуллозода). – 3 июн дар ҷаласаи  васеи Шӯрои Академияи  рассомии  Тоҷикистон рассом, академики Академияи  рассомии  Тоҷикистон  Олимхон  Рабиев  раиси  нави академия  интихоб гардид. 
Тавре  ки аз  Вазорати  фарҳанги  Тоҷикистон  хабар  доданд, Нависандаи  халқии   Тоҷикистон, дорандаи Мукофоти  давлатӣ Абдулҳамид  Самадов  узви  вобастаи Академияи  рассомии  Тоҷикистон, нависанда,  тарҷумон,  доктори  фахрии  фалсафа  дар  бахши  адабиёт Абдуғаффор  Абдуҷабборов  ва  рассоми  маъруф, Ходими  шоистаи  санъати ҷумҳурӣ  Ҷонибек  Асоев академикҳои  Академияи  рассомии  Тоҷикистон  интихоб  шуданд.
Дар  ҷаласа  раиси  собиқи  академия, Рассоми  халқии  Тоҷикистон,  ҷоизи  Мукофоти  давлатӣ Вафо  Назаров аз  кори  иҷрошуда тайи  панҷ  соли охир гузориш  дод. 
Зикр  шуд, ки  таъсиси  академия  ба рушди  санъати  тасвирии  ҷумҳурӣ  мусоидат  карда,  бори нахуст  дар таърихи  санъати тасвирӣ  18  нафар  рассомони  машҳур  ба  ҳайси  академикҳои  Академияи  рассомии  Тоҷикистон  ва  бархе  ходимони санъати  Русия аъзои  фахрии хориҷии  он  интихоб  гардиданд. Бо  ибтикори  академия  якчанд  намоишгоҳҳо ташкил  намуда,  рассомони  болаёқати  ҷавон  дар семинарҳои  кишварҳои  хориҷӣ  иштирок  карданд.