Роҳхат барои ҳифзи Ватан

Хуҷанд, 24.06.2014. (АМИТ «Ховар»,  Самад Юсуфӣ).- 24 июн  дар факултаи №4-и Академияи ВКД Ҷумҳурии Тоҷикистон маросими хатми курсантони курси чорум баргузор гардид. Дар чорабинӣ сардори Академияи ВКД Ҷумҳурии Тоҷикистон, доктори илмҳои ҳуқуқ, генерал-майори милитсия Маҷидзода Ҷўрахон Зоир оид ба иҷрои вазифаҳои мардонагиву шуҷоатмандӣ ва ҳифзи Ватан сухан ронда, ба хатмкунандагон дар ҷодаи хизмати пуршараф дар мақомоти корҳои дохилӣ, ҳифзи амнияту тартиботи ҷамъиятӣ ва мубориза бо ҳама гуна ҷинояту ҳуқуқвайронкуниҳо комёбиҳо таманно намуд. Ба хатмкунандагони ин даргоҳ дар фазои тантанавӣ диплом супорида шуд.
Сипас маросими гузашти тантанавӣ аз тарафи ҳайати афсарон, хатмкунандагон ва курсантони факулта сурат гирифт. 
Ҳамчунин рухдоди дигари хотирмон дар ин рӯз-ин аз тармими асосӣ баровардани бинои нави таълимӣ буд. Бинои мазкур дорои синфхонаҳои таълимӣ, китобхона ва як бинои маркази тестӣ аст. Изҳори умед карда шуд, ки дар соли хониши нав васоити техникӣ пурра дар хидмати курсантон қарор мегиранд.