Сафари кории М. Ҷабборӣ ба Ваҳдат ва Файзобод

Душанбе, 26.06.2014. (АМИТ «Ховар», Бекназари Абӯбакр). Дирӯз, 25 июн муовини Сарвазири Ҷумҳурии Тоҷикистон Марҳабо Ҷабборӣ зимни сафари корӣ ба шаҳру ноҳияи Ваҳдат ва Файзобод бо фаъолияти муассисаҳои соҳаҳои иҷтимоӣ, маориф, тандурустӣ ва фарҳанг шинос гардид. 
Дар ҷараёни сафари корӣ аз ҷониби муовини Сарвазири мамлакат вобаста ба бартарафсозии мушкилоту камбудиҳои ҷойдошта, аз ҷумла раванди ҳозиршавии мутахассисони ҷавон ба ҷойи кор, эҳтиёҷ ба мутахассисони соҳавӣ, беҳтарсозии сатҳу сифати хизматрасонии тиббӣ, фаъолияти муассисаҳои иҷтимоӣ, баланд бардоштани сифати таълиму тарбия дар муассисаҳои таҳсилоти миёнаи умумӣ ва томактабӣ, инчунин ривоҷу равнақ додани ҳунарҳои мардумӣ ба масъулини соҳа дастуру супоришҳои дахлдор дода шуданд.
Ҳамзамон дар ноҳияи Файзобод мулоқоти муовини Сарвазири Ҷумҳурии Тоҷикистон Марҳабо Ҷабборӣ бо фаъолзанони ин навоҳӣ баргузор шуда, дар он масъалаҳои нақши занон дар рушди кишвар, татбиқи қонунҳо «Дар бораи масъулияти падару модар дар таълиму тарбияи фарзанд», «Дар бораи танзими анъана ва ҷашну маросимҳо дар Ҷумҳурии Тоҷикистон», ҳалли мушкилоти имрўзаи ҷомеа, доир ба паст кардани тамоюли зуҳуроти номатлуб, зўроварӣ дар оила ва дигар масъалаҳои мубрами рўз матраҳ гардиданд.