Сарвазири Покистон бар пояи ҳайкали Сомонӣ гулчанбар гузошт

Душанбе, 17.06.2014. (АМИТ «Ховар», Мавҷуда Анварӣ). — Сарвазири Ҷумҳурии Исломии Покистон Муҳаммад Навоз Шариф, ки бо сафари расмӣ ба Тоҷикистон ташриф овардааст, имрӯз пас аз анҷоми маросими расмии қабул ва мулоқоту музокироти сатҳи олии ҳарду кишвар ба назди Маҷмааи Ваҳдати миллӣ ва эҳёи Тоҷикистон омада, бар пояи ҳайкали асосгузори нахустин давлати тоҷикон — шоҳ Исмоили Сомонӣ гулчанбар гузошта, ба арзишҳои волои миллию таърихии миллати бостонии тоҷик арзи эҳтиром ба ҷо овард.
Маросими гулчанбаргузорӣ дар фазои пуршукӯҳи тантанавӣ бо иштироку ҳамроҳии ҷузъу томҳои Горди фахрии Тоҷикистон ва ҳунарнамоии оркестри низомии асбобҳои нафасӣ ҷараён гирифт.