Соли 2013 164 ноболиғ аз озодӣ маҳрум шуд

 
 Душанбе, 17.06.2014. (АМИТ «Ховар», Мавҷуда Анварӣ).- Бобати таъмини иҷрои дастуру супоришҳои Президенти мамлакат, ки зимни вохӯрӣ  бо ҷавонон ва намояндагони аҳли ҷомеаи мамлакат баён гардиданд, инчунин татбиқи қонунҳои ҶТ  «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросимҳо дар ҶТ» 16 июни соли ҷорӣ ҳайати кормандони Шӯрои адлияи кишвар  бо донишҷўён ва омӯзгорони Донишгоҳи аграрии ҶТ вохӯрданд.
Мақсад аз мулоқот бори дигар рӯ овардан ба мушкилиҳои ҷойдоштаи ҷомеаи ҷавонон, алалхусус даст задани ноболиғон ва ҷавонон ба ҷиноят, ҳуқуқвайронкунии маъмурӣ, кирдорҳои ҷинояткорона ва пешгирӣ намудани онҳо арзёбӣ гардид. 
Кормандони  Шӯрои адлия дар назди донишҷӯён зикр карданд, ки имрӯзҳо бештар аз ҷониби ноболиғон ва ҷавонон ҷиноятҳо, аз қабили қасдан расонидани зарари вазнин ба саломатӣ,  одамкушӣ, ғайриқонунӣ сохтани яроқ, муомилоти ғайриқонунии воситаҳои нашъадор, вайрон кардани қоидаҳои ҳаракати роҳ ва истифодаи воситаҳои нақлиёт, авбошӣ,  дуздӣ, қаллобӣ, ғоратгарӣ, роҳзанӣ, ғайриқонунӣ идора кардани мошин ё дигар воситаҳои нақлиёт содир  мешаванд. Боиси таассуф аст, ки дар соли 2011  нисбат ба 118 ноболиғ, соли 2012 нисбат ба 146, дар соли 2013  нисбат ба 164 ноболиғ ҷазои маҳрум сохтан аз озодӣ таъйин гардид.
Кормандони  Шӯрои адлия дар назди донишҷӯён изҳор намуданд, ки танҳо дар якҷоягӣ метавон бо ҷинояткорӣ мубориза бурд. 
Дар ин бора ба АМИТ «Ховар» Маҳбуба Сафарова, сардори раёсати судҳои дастгоҳи Шӯрои адлия хабар дод.