Созишномаи байни Тоҷикистону НАТО ба тасвиб хоҳад расид

                Душанбе, 23.06.2014.(АМИТ „Ховар“, Марзия Саидзода).-Дар ҷаласаи Шӯрои палатаи поёнии Парлумони мамлакат, ки 23 июн таҳти раёсати Шукурҷон Зуҳуров-раиси Маҷлиси намояндагони Маҷлиси Олии ҷумҳурӣ баргузор гардид, як қатор санадҳои байналмилалӣ баррасӣ гардиданд. 
              Аз ҷумла, аъзои Шӯрои Маҷлиси намояндагон Созишномаи байни Ҷумҳурии Тоҷикистон ва Созмони Аҳдномаи Атлантикаи Шимолӣ /СААШ-НАТО/ дар бораи дастгирии кишвари қабулкунанда ба нерӯҳои СААШ ва ҳайати СААШ ва оид ба транзити қӯшунҳои СААШ ва ҳайати СААШ, Созишномаи қарзӣ байни Ҷумҳурии Тоҷикистон ва Бонки исломии рушд оид ба лоиҳаи «Таҷдиди зеристгоҳи барқии «Равшан» дар Ҷумҳурии Тоҷикистон»,  Созишномаи грантӣ байни Ҷумҳурии Тоҷикистон ва Фонди байналмилалии рушди кишоварзӣ оид ба лоиҳаи «Беҳтарсозии сатҳи зиндагӣ дар Хатлон», Созишнома дар бораи маблағгузорӣ байни Ҷумҳурии Тоҷикистон ва Фонди байналмилалии рушди кишоварзӣ оид ба лоиҳаи «Рушди чорводорӣ ва чарогоҳҳо», Шартнома оид ба маблағгузории Лоиҳаи «Фондҳои ҷамоавӣ барои мусоидати рушди маълумоти асосӣ ва барқарорсозии инфрасохтори коммуналӣ, марҳилаи II» байни Институти қарзии таҷдиди Франкфурти Майни (KfW) Ҷумҳурии Тоҷикистон ва Бунёди миллии иҷтимоии маблағгузории Тоҷикистонро матраҳ намуданд. Зикр шуд, ки санадҳои мазкур бобати рушди соҳаҳои иқтисодию иҷтимоии кишвар нақши муассир хоҳанд гузошт.