Суғд ба Рӯзи муборизаи зидди маводи мухаддир тайёрӣ мебинад
Душанбе, 16.06.2014. (АМИТ «Ховар», Лайло Тоирӣ). — Кормандони Раёсати Агентии назорати маводи нашъаовари назди Президенти ҶТ дар вилояти Суғд дар арафаи Рӯзи байналмилалии муборизаи зидди сӯистеъмоли маводи мухаддир ва гардиши ғайриқонунии он, ки ҳар сол 26 июн таҷлил мешавад, бархе чорабиниҳоро роҳандозӣ менамоянд.
Мувофиқи маълумоти Агентии назорати маводи нашъаовар, кормандони Агентӣ бо хидматчиёни ҳарбии яке аз қисмҳои низомии қӯшунҳои дохилии ҶТ дар шаҳри Хуҷанд суҳбат оростанд. Дар ҷараёни суҳбат бо сарбозону афсарон масоили мубрами марбут ба гардиши ғайриқонунии маводи мухаддир ва қаламрави Тоҷикстонро чун давлати транзитӣ истифода намудани нашъаҷаллобон мавриди муҳокима қарор гирифтанд.
Ҳамчунин дар факултаи забонҳои хориҷии Донишгоҳи давлатии Хуҷанд ба номи академик Б.Ғафуров вохӯрии кормандони Агентӣ бо омӯзгорону донишҷӯён баргузор шуд.
Якҷоя бо намояндагони мақомоти маҳаллии ҳокимияти иҷроия ва шуъбаи ҷавонон, варзиш ва сайёҳӣ дар мактаби варзишии шаҳри Хуҷанд бо ҷалби шуъбаҳои мухталифи варзишии мактабҳо иқдоми варзиши оммавӣ таҳти шиори «Мо зидди маводи мухаддирем» рӯи кор оварда шуд.
Муовини раиси шаҳри Хуҷанд И.Сангинов ва корманди Агентӣ Ш.Абдуллозода зимни суханрониашон қайд намуданд, ки мақомоти ҳифзи ҳуқуқи кишвар ба манзури татбиқи сиёсати Ҳукумати Ҷумҳурии Тоҷикистон дар бахши сиёсати зидди маводи мухаддир барои ҷилавгирии истифодаи маводи нашъаовар кори зиёдеро баҷо меоранд.