Тағйирот дар мусобиқот барои дарёфти Ҷоми президенти Қазоқистон

Душанбе, 23.06.2014. (АМИТ «Ховар», Пайрави Қосим). – Дар ҳайати иштирокдорони Мусобиқоти байналмилалӣ оид ба футбол барои дарёфти Ҷоми президенти Қазоқистон — 2014, ки дар он дастаи наврасони Тоҷикистон (U- 16) иштирок менамояд, тағйирот ворид гардид.Назар ба иттилои Федератсияи футболи Тоҷикистон, чанде пеш хабар дода шуда буд, ки дар ин мусобиқот, ки аз 25 то 29 июн дар шаҳри Остона баргузор мегардад, 8 даста иштирок мекунад. Вале кумитаи тадорукоти мусобиқот ба Федератсияи футболи Тоҷикистон хабар дод, ки дар ҳайати иштирокдорон ва тақвими вохӯриҳо тағйирот рух додааст. Дастаи мунтахаби Эрон, ки мебоист якҷоя бо дастаи кишвари мо дар гурӯҳи «В» қувваозмоӣ намояд, дар мусобиқот иштирок намекунад. Дастаи Чин ҳам аз иштирок дар ин мусобиқот худдорӣ кардааст. Ба ҳамин тариқ, дар мусобиқот барои дарёфти мукофоти фахрӣ дастаҳои шаш кишвар қувваозмоӣ менамоянд. Дар гурӯҳи «А» дастаҳои Қазоқистон, Гурҷистон, Қирғизистон ва дар гурӯҳи «В» дастаҳои Испаниё, Тоҷикистон ва Озарбойҷон бо ҳам вомехӯранд.Дастаи мунтахаби наврасони Тоҷикистон 24 июн бо дастаи Озарбойҷон ва рӯзи дигар бо футболбозони дастаи мунтахаби Испаниё вомехӯрад.