Таҷлили Рӯзи Русия дар Театри ба номи С. Айнӣ
Душанбе, 13.06.2014. (АМИТ «Ховар», Анна Мошенко). — 12 июн бахшида ба Рӯзи Русия ва оғози рӯзҳои вилояти Томск дар Тоҷикистон дар Театри опера ва балети ба номи Садриддин Айнӣ ҷамъомад баргузор шуд.Муовини вазири фарҳанги Тоҷикистон Бунафша Одинаева ҳамаи ҳозиронро бо Рӯзи Русия муборакбод карда, зикр намуд, ки дар ҳошияи рӯзҳои вилояти Томск дар ҶТ чандин иқдомоти маърифатию фарҳангӣ роҳандозӣ мешавад. «Олимон, омӯзгорон, намояндагони маъмурияти вилояти Томск ба Тоҷикистон омадаанд. Байни вилояти Томск ва Тоҷикистон муносибатҳои хуби ҳамкорию ҳамфикрӣ барқарор шуданд. Имрӯз садҳо нафар донишҷӯёни Ҷумҳурии Тоҷикистон дар вилояти Томск таҳсил мекунанд», — гуфт зимни суханрониаш Сафири Федератсияи Русия дар Тоҷикистон Игор Лякин — Фролов.«Томск шаҳри зебою дилоро буда, аз нигоҳи теъдоди донишҷӯёни хориҷӣ дар Русия мақоми сеюмро касб мекунад. Дар вилоят донишҷӯёни 14 кишвари ИДМ ва 25 кишвари хориҷи дур таҳсил мекунанд. Дар ҳошияи ҳамкорӣ ба кишварҳои якдигар сафарҳои нафақат донишҷӯён, балки омӯзгорон ҳам дар назар аст. Ғайр аз ин чанд рӯз пеш дар Донишгоҳи технологии Тоҷикистон факултаи таълими ғоибонаи донишҷӯёни тоҷик дар донишгоҳи Томск кушода шуд», — гуфт намояндаи ҳайати Томск Алексей Пушкаренко.