Таъмири 1400 км роҳ дар Суғд

Душанбе, 24.06.2014. (АМИТ «Ховар», Абдуаҳад Шарифзода).-Дар шимоли кишвар корҳои таъмиру мумфаршкунии роҳҳо бо суръат идома доранд. 
Тавре ки аз шуъбаи нақлиёт ва коммуникатсияи мақомоти иҷроияи ҳокимияти давлатии вилояти Суғд иттилоъ доданд, то 20 июн дар қаламрави вилоят 1388,6 км роҳ таъмиру тармим шудааст. 
Аз ин миқдор 27, 4 км роҳ пурра мумфарш шуда, 485,5 километр аз таъмири ҷорӣ бароварда шудааст. Инчунин дар саросари вилоят бештар аз 875 километр роҳ шағалпӯш шудааст. Бояд гуфт, ки соли равон мувофиқ ба нақша дар вилоят бештар аз 2350 километр роҳҳои дохилӣ таъмиру навсозӣ хоҳанд шуд.