Татбиқи барномаҳои миллӣ ба воситаи ВАО

Душанбе, 24.06.2014 (АМИТ «Ховар», Мавҷуда Анварӣ).- Дар доираи лоиҳаи «Дастгирии самараноки ҳамоҳангсозии миллии кумаки берунӣ ва мониторинги  барномаҳои миллӣ»  бо дастгирии Барномаи Рушди СММ ва Вазорати рушди иқтисод ва савдо бо иштироки 70 намояндаи васоити ахбори омма дар вилоятҳои Суғду Хатлон, Вилояти Мухтори Кӯҳистони Бадахшон, шаҳри Душанбе ва ноҳияҳои тобеи марказ семинарҳои омӯзишӣ баргузор гардиданд.
        Мақсади асосии семинарҳои омӯзишӣ шиносоии хабарнигорон бо  хуҷҷатҳои стратегии кишвар ва баланд бардоштани донишҳои иқтисодии онҳо мебошад. 
       Ҳамчунин огоҳии мардум доир ба «Стратегияи миллии рушд», «Стратегияи баланд бардоштани сатҳи некӯаҳволии мардум барои солҳои 2013-2015» ва «Барномаи рушд дар сатҳи маҳал тавассути ВАО» аз мақсадҳои дигари ин семинарҳо мебошад.
      Бояд гуфт, ки дар сурати фаъол будани хабарнигорон дар ин самт  алоқаи тарафайни аҳолӣ ва масъулин дар амалисозии барномаҳои миллӣ беҳтар мегардад.
Тибқи нақша 23 июни соли ҷорӣ чунин як семинари омӯзишӣ барои намояндагони ВАО-и маҳаллии ноҳияҳои водии Рашт баргузор гардид.