Тоҷикистон аз реҷаи “мониторинги қатъӣ” баромад

Душанбе, 25.06.2014. (АМИТ «Ховар», Лайло Тоирӣ).- Тавре ки каблан иттилоъ дода будем, аз 16 то 20 июни соли 2014 дар шаҳри Маскави Федератсияи Русия 20-умин ҷаласаи пленарии Гурӯҳи АвруОсиё дар самти муқовимат ба қонунигардонии даромадҳое, ки бо роҳи ҷиноят ба даст оварда шудаанд ва маблағгузории терроризм баргузор гардид. Бино ба иттилои хадамоти матбуоти Бонки миллии Тоҷикистон, дар соли 2008 Ҷумҳурии Тоҷикистон баъди баҳогузории Бонки ҷаҳонӣ бинобар мутобиқ набудани қонунгузории ҷумҳурӣ ба тавсияҳои Гурӯҳи татбиқи чораҳои молиявии муқовимат ба шустани пул (ФАТФ) ва мавҷуд набудани мақоми махсуси ваколатдор дар ин самт таҳти реҷаи “мониторинги қатъӣ”-и Гурӯҳи АвруОсиё қарор гирифт. Барои баромадан аз ин реҷаи махсус тибқи тартиби кории Гурӯҳи мазкур ҷумҳурӣ соле ду маротиба дар ҳар як ҷаласаи Гурӯҳи АвруОсиё ҳисоботи муфассалро доир ба корҳои иҷрошуда пешниҳод менамуд ва ин ҳисобот аз ҷониби котиботи ин гурӯҳ баррасӣ ва баҳогузорӣ мегардид. Ҳисоботи муфассали сесолаи ҷумҳурӣ дар ҷаласаи навбатӣ аз ҷониби коршиносон — баҳогузорон муҳокима гардид. Тибқи хулоса ҳисоботи ҷумҳурӣ бинобар мутобиқ гардидани қонунгузории Ҷумҳурии Тоҷикистон ба тавсияҳои ФАТФ ва амалан мавриди истифода қарор гирифтани онҳо қобили қабул шуморида шуда, мусбат арзёбӣ гардид. Дар натиҷаи корҳои анҷомёфта, мутобиқи изҳороти умумии ҷаласаи пленарии 20-уми Гурӯҳи АвруОсиё Ҷумҳурии Тоҷикистон аз таҳти реҷаи “мониторинги қатъӣ” бароварда шуда, ба реҷаи “мониторинги муқаррарӣ” дохил карда шуд.