Тоҷикистон доруҳои зидди бемории силро худ харидорӣ мекунад

Душанбе, 17.06.2014. (АМИТ «Ховар», Екатерина  Пасторова). — «Дар  Тоҷикистон  чор  сол  боз аз ҷониби соҳибкорони инфиродӣ овардану паҳн  кардани  доруҳои  зидди  бемории  сил  манъ  шудааст. Мо сар  аз  соли  2016 иҷрои  ин  вазифаро  ба  ӯҳдаи  худ  гирифтанием», —  гуфт  зимни  сӯҳбат  бо  хабарнигори АМИТ «Ховар»  директори Маркази ҷумҳуриявии ҷилавгирии   бемории  сил  Ӯктам  Бобохоҷаев.  
Мувофиқи  суханони  мавсуф,  ҳоло  Тоҷикистон   дар  мавриди  ба  кишвар  овардани  доруҳои  зидди бемории  сил  ягон  душворие  надорад. Аз  ҳисоби  Бунёди  ҷаҳонӣ  барои  814  нафар  беморони вазнини  сил  ва  6  ҳазор  нафар беморони  вазъашон начандон  душвор  дору  оварда,  тавассути Марказ  дар  муассисаҳои тиббии  ҷумҳурӣ ба таври  ройгон дастраси  ҳар  бемор  карда  мешавад.
«Мо  ба  туфайли   манъи овардан  ва  бидуни  назорат  паҳн  кардани  доруҳои  зидди  бемории  сил  тайи  якчанд  сол  ба   коҳиш  ёфтани  ин  беморӣ  муваффақ   гардидем,   зеро  беморон  доруро  фақат  бо   фармудаи  духтур  ва  таҳти  назорати  қатъӣ  истифода  мекунанд», —  гуфт  Ӯктам  Бобохоҷаев.
Мувофиқи  суханони  номбурда,  дар  натиҷаи  ин  чорабинӣ  имрӯз  дар  кишвар  88 фоизи  беморони  мубталои  сил   шифо  меёбанд.  Табибон  то соли  2015  ин  нишондодро  дар  ҳошияи Барномаи  миллии  муборизаи  зидди  бемории  сил ба  90  фоиз  расониданианд.