Ваколатҳои кадом субъектҳои хоҷагидор қатъ мешаванд?

Душанбе,13.06.2014. (АМИТ «Ховар», Лайло Тоирӣ).- Хадамоти муҳоҷирати Вазорати меҳнат, муҳоҷират ва шуғли аҳолӣ, Вазорати корҳои дохилӣ, Сарраёсати консулгарии Вазорати корҳои хориҷӣ, Кумитаи ҷавонон, варзиш ва сайёҳӣ имрӯз дар шаҳри Душанбе бо субъектҳои хоҷагидор мулоқоти муштараки машваратӣ баргузор намуданд.  «Мақсад аз баргузории чунин мулоқот баррасӣ ва ҳалли мушкилоти муҳоҷирони меҳнатӣ аст. Имрӯз, мо кӯшиш менамоем сабабҳое, ки ба фаъолияти субъектҳои хоҷагидори ба интиқол ва ҷалби қувваи корӣ машғуланд, халал мерасонанд, ошкор намоем»,- гуфт сардори Хадамоти муҳоҷират Анвар Бобоев. Абдуллои Қодирӣ, сардори шуъбаи робита бо ҷомеаи ин хадамот афзуд, ки имрӯз дар ҷумҳурӣ 41 субъкти хоҷагидор ба интиқоли муҳоҷирон ба хориҷа ва бархе ба ҷалби қувваи корӣ машғуланд. Танҳо 8 адад аз ин субъктҳо пайваста ба интиқоли шаҳрвандони Тоҷикистон ба хориҷа машғул ҳастанду халос. Дар вохӯрии имрӯза, аз ҷумла ҳадаф ва максадҳои асосии субъктҳои хоҷагидор баррасӣ гардида, ваколатҳои барх аз онҳо катъ мегарданд. Дар рафти мулоқот санадҳои меъёрии ҳуқуқӣ дар самти муҳоҷирати шаҳрвандони хориҷӣ ба Ҷумҳурии Тоҷикистон низ баррасӣ мегардад.