Вазифаҳои нави Бонки миллии Тоҷикистон

 Душанбе, 25.06.2014.(АМИТ «Ховар», Марзия Саидзода).-Минбаъд Бонки миллии Тоҷикистон барои  ҳимояи манфиатҳои  истеъмолкунандагони хизматрасониҳои  низоми бонкӣ шароити беҳтар фароҳам меорад. Дар робита ба ин 25 июн вакилони палатаи поёнии Парлумони Тоҷикистон ба лоиҳаи  Қонуни Ҷумҳурии Тоҷикистон «Дар бораи Бонки миллии Тоҷикистон» тағйиру иловаҳо ворид намуданд. Абдуҷаббор Ширинов-раиси Бонки миллии  Тоҷикистон дар назди вакилони Парлумон гуфт, ки лоиҳаи қонуни мазкур бо мақсади иҷрои «Стратегияи рушди бахши бонкӣ барои солҳои 2010-2015» оид  ба ҳимояи манфиатҳои истеъмолкунандагони хизматрсониҳои  низоми  бонкӣ, инчунин ба қонунгузории ҷорӣ мутобиқ намудани Қонуни Ҷумҳурии Тоҷикистон «Дар бораи Бонки миллии Тоҷикистон» ба Маҷлиси намояндагон пешниҳод шудааст. Тибқи лоиҳа  ба  қисми якуми моддаи 6-и  лоиҳаи Қонуни Ҷумҳурии Тоҷикистон «Дар бораи Бонки миллии Тоҷикистон»  илова ворид гардида, он  ба зиммаи Бонки миллии Тоҷикистон вогузор намудани  вазифаи нав -ташкили шароити мусоид барои ҳимояи  истеъмолкунандагони хизматрасониҳои низоми бонкиро пешбинӣ менамояд.  Дар ин самт аз ҷониби Бонки миллии Тоҷикистон тадбирҳои мушаххас андешида мешаванд, ки таъмини шаффофияти фаъолияти ташкилотҳои қарзӣ, баррасии арзу шикояти  муштариён нисбат ба амалҳои  ташкилотҳои қарзӣ ва андешидани  чораҳо ҳангоми вайрон кардани талаботи қонунгузорӣ аз ҳамин қабиланд.  
              Исмоил Талбаков- узви Кумитаи  Маҷлиси намояндагон оид ба иқтисод ва молия зимни тавзеҳи масъалаи мазкур гуфт, ки лоиҳаи ин қонун аз тарафи Ҳукумати  Ҷумҳурии Тоҷикистон ба Парлумон пешниҳод шудааст ва ҳадафи он ҳимояи манфиатҳои истеъмолкунандагони  хизматрасониҳои  низоми бонкӣ бинобар начандон баланд будани сатҳи дониши молиявии онҳост. Исмоил Талбаков афзуд, ки солҳои охир шумораи  истеъмолкунандагони хизматрасониҳои низоми бонкӣ дар кишвар афзоиш меёбад, ки он падидаи нек дар низоми бонкию қарзист ва дар ин самт саводнокии хизматрасониҳои бонкӣ беҳбудиро талаб менамояд. Инчунин, ба қисми се моддаи 48 лоиҳаи қонун тағйиру иловаҳо ворид шуданд, ки тибқи он барои  халалдор сохтани  манфиатҳои истеъмолкунандагони низоми бонкӣ, Бонки миллии Тоҷикистон тадбирҳои фаврӣ ва таъсиррасонро меандешад.