Ярмаркаи «ИнтерЛегПром — 2014» дар Душанбе

Душанбе, 04.06.2014. (АМИТ «Ховар», Марҳабои  Азамат). — Иттифоқи  косибони  Тоҷикистон бори  аввал  дар Ярмаркаи  байналмилалии «ИнтерЛегПром — 2014» иштирок  менамояд.  Маросими ифтитоҳи  ярмарка  имрӯз, 4  июн,  дар «Кохи  Борбад» — и  шаҳри  Душанбе  баргузор  мегардад. 
Дар  ин  бора  котиби  матбуоти  Иттифоқи  косибони  Тоҷикистон  Аниса  Собирӣ  ба АМИТ «Ховар»  хабар  дод. 
Мувофиқи  суханони  манбаъ,  дар  ярмарка  баробари  маҳсулоти  корхонаҳои саноати  сабуки  кишвар, маҳсули  косибон  низ  ба маърази  намоиш  гузошта  шудааст. 
Гӯшаи Иттифоқи  косибони  Тоҷикистон  дар  ошёнаи  якуми  намоишгоҳ  қарор  дошта,  дар  он маҳсулоти гуногуни  косибон,  сӯзанӣ ва  намудҳои  анъанавии  гулдузӣ,  кошинкории усто Сӯҳроб  Саидов,  маснуоти  заргарӣ ва  ғайра  намоиш дода  мешавад. 
Хотирнишон  месозем, ки  Намоишгоҳ —  ярмаркаи  8 — уми  байналмилалии  саноати  сабук «ИнтерЛегПром — 2014» бо  ибтикори Палатаи  савдо  ва  саноати Тоҷикистон ва  бо  дастгирии Ҳукумати  ҶТ  ва Вазорати  энергетика  ва  саноати  кишвар аз  4  то  7  июн  дар «Кохи  Борбад» — и  шаҳри  Душанбе давом  мекунад.