Ёде аз собиқадори соҳаи маориф

 
Кӯлоб, 5.06.2014. (АМИТ «Ховар», Сулаймони Хол).- Ба хотири гиромидошти собиқадори соҳаи маориф Фазл Набӣ дар ноҳияи Ҳамадонӣ маҳфили маърифатӣ ороста шуд, ки дар он намояндагони ҳукумати ноҳия,  кормандони соҳаи маориф, шогирдон ва фарзандони марҳум иштирок намуданд.  
Фазл Набӣ аз солҳои 30-юми асри гузашта фаъолияти омӯзгории хешро дар мавзеи Дашти Ҷуми собиқ ноҳияи Маскав, дар айни замон Ҳамадонӣ оғоз намуда, баҳри маҳви камсаводӣ хизматҳои арзанда кардааст. 
Фазл Набӣ бо роҳхати Вазорати маориф ва илми кишвар ба ноҳияи Ҳамадонӣ ба кор омада, аввалин маорифчиест, ки унвони «Аълочии маориф»-ро сазовор гашта, дар давоми фаъолияти хеш ҳазорон нафар шогирдонро таълим дода, ба камол расонидааст. 
Дар ҳамоиши маърифатӣ мактаббачагон аз «Фазилатнома»-и Фазл Набӣ порчаҳо қироат намуданд.