Зуҳуров бо унвони «профессори фахрӣ» қадр гардид

Душанбе, 19.06.2014.(АМИТ «Ховар», Марзия Саидзода).-Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо унвони  «Профессори фахрии Донишгоҳи давлатии заминсозии шаҳри Маскав» ва медали ҷашнии «Таърихи Донишгоҳи давлатии заминсозӣ» қадрдонӣ шуд. Ин ҷоизаҳоро дар маросими ботантана ба раиси палатаи поёнии Парлумони Тоҷикистон ректори донишгоҳи мазкур Сергей Волков супорид. 
    Бояд тазаккур дод, ки Шукурҷон Зуҳуров -раиси Маҷлиси намояндагони Маҷлиси Олии Ҷумҳурии Тоҷикистон зимни сафари расмӣ ба Русия аз донишгоҳи мазкур боздид намуда, бо ҳайати устодону донишҷӯёни ин муассисаи олии илмии Русия мулоқот анҷом дод. Ш. Зуҳуров доир ба вазъи кунунии ҳаёти сиёсию иқтисодӣ ва иҷтимоию фарҳангии Тоҷикистон ва дастовардҳои  кишварамон дар тӯли солҳои истиқлолияти давлатӣ, ҳамкориҳои мутақобилан судманди Тоҷикистону Русия дар соҳаҳои мухталиф   гузориш дод. 
Мавриди зикр аст, ки Шукурҷон Зуҳуров дастпарвари Донишгоҳи давлатии заминсозии Маскав буда, онро 38 сол муқаддам, соли 1976 бо ихтисоси «муҳандис -заминсоз» хатм намудааст. Ш. Зуҳуров дар ҳоле аз ин донишгоҳ боздид намуд, ки аз таъсиси ин муассисаи илмӣ 235 сол сипарӣ гардид.