Ғолибияти Олмон бар дастаи Аргентина дар Ҷоми ҷаҳон
Душанбе, 14.07.2014. (АМИТ «Ховар», Меҳрони Қурбон).- Бозии ниҳоии Ҷоми ҷаҳон-2014 шоми 13 июл дар варзишгоҳи пуршӯҳрати «Маракана» дар Рио -де -Жанейро байни Олмону Аргентина ба фоидаи дастаи Олмон анҷом ёфт. Дар ду қисми асосӣ ва қисми якуми иловагии бозӣ ҳисоб кушода нашуд. Қисми дуюми иловагӣ низ бозиро ба сӯи силсилаи тӯбҳои 11-метрӣ мебурд, ки дар дақиқаи 113 Марио Гётсе бо як зарбаи хотирмон тӯбро вориди дарвозаи Аргентина кард. Лионел Месси, ки ин дафъа ҳам бозии чандон барҷастае надошт, дигар коре аз дасташ наомад ва унвони қаҳрамонии футболи ҷаҳонро Олмон ба даст овард. Бояд зикр кард, ки дастаи Олмон нахустин дастаи аврупоист, ки дар қораи Амрико барандаи унвони қаҳрамони дунё мешавад. То кунун дар ҳама чемпионатҳои ҷаҳоние, ки дар Амрико мегузашт, дастаҳои ин қора ва дар ҳама чемпионатҳое ки дар Аврупо доир шудааст, аврупоиҳо баранда шудаанд. Берун аз ин ду қора ҳисоби онҳо мусовист, чунки соли 2002 дар Кореяву Ҷопон дастаи Бразил ва дар соли 2010 дар Африқои ҷанубӣ дастаи Испания ғолиб омаданд.Ёдовар мешавем , ки дастаҳои Аргентина ва Олмон барои бори саввум дар сабқати ниҳоии Ҷоми ҷаҳон бо ҳам рақобат мекунанд. Дастаи Аргентина дар соли 1986, ки ситораи футболи ҷаҳонӣ Диего Марадонаро бо худ дошт, бо ҳисоби 3:2 бари дастаи Олмон ғолиб омада буд. Хотиррасон менамоем, ки дар бозии финалии чаҳор соли баъд, ки дар Италияи доир шуд, дастаи олмониҳо интиқоми бохти худро гирифтанд ва ҷомро бо худ бурданд. Дастаи Олмон ҳамин тавр, дар ду Ҷоми ҷаҳонии охири — солҳои 2006 ва 2010 –дастаи Аргентинаро аллакай дар даври чорякниҳоӣ ноком кардааст. Аз ҷумла, дар соли 2010 дастаи Аргентина, ки мураббиаш Марадона ва ситорааш ҳамин Лионел Месси буд, аз Олмон бо ҳисоби бузурги 0-4 шикаст хӯрда буд.
Ногуфта намонад, ки дастаи мунтахаби футболи Олмон ғолибияти худро дар Ҷоми ҷаҳон истиқбол доранд.