Қонуншиканиҳо аз ҷониби ширкатҳои мобилии кишвар

Душанбе, 21.07.2014. (АМИТ «Ховар», Мавҷуда Анварӣ). — Дар нишасти матбуотие, ки имрӯз дар Кумитаи андози назди Ҳукумати ҶТ бо иштироки роҳбарияти ин ниҳод баргузор гардид, натиҷаи фаъолияти кумита дар нимсолаи аввали соли 2014 мавриди баррасӣ қарор гирифт. Раиси Кумитаи андоз Нусратулло Давлатзода иброз намуд, ки кормандони кумита ҳангоми санҷиш қонуншиканиҳои зиёдеро аз ҷониби ширкатҳои мобилии кишвар ошкор кардаанд. Масалан бо ширкати мобилии Babilon, ки нархномаҳои таъинкардаи Хадамоти зиддиинҳисории кишварро риоя накардааст, баҳси додгоҳӣ доранд. Дар ширкатҳои Tcell ва Мegafon (МЛТ) низ камбудиҳо ошкор гардидаанд.Раиси Кумитаи андоз илова намуд, ки дар маҷмуъ феълан бо андозсупорандагон барои 800 миллион сомонӣ қарзи баҳснок вориди мурофиаи додгоҳӣ шудаанд, ки аз ин 519 миллион сомониаш ба шашмоҳаи аввали соли равон рост меояд. “Аз 14 ҳазор нуқтаи санҷидашуда 3 ҳазору 832 ҳолати бидуни қайд дар мақомоти андоз ба фаъолияти соҳибкории ғайриқонунӣ машғул гардидани шахсони воқеӣ ошкор гардид. Инчунин дар рафти гузаронидани санҷишҳои амалиётӣ 385 ҳолати бе қайди мақомоти андоз аз тарафи шахсони воқеӣ ба иҷора додани молу мулки ғайриманқул ва бе шартномаи байни корфармо ва коргар дар ҳисоботҳо дарҷ нагардидани 1 ҳазору 249 нафар коргари кироя, 624 ҳолати вайрон намудани тартиби истифодаи мошинаҳои назоратии хазинавӣ ошкор карда шуд”,- гуфт Нусратулло Давлатзода.