Ҷараёни корҳои сохтмонӣ дар Хоруғ

Душанбе, 26.07.2014. (АМИТ «Ховар», Мавҷуда Анварӣ). — Дар шаҳри Хоруғи ВМКБ сохтмони 23 иншооти таъиноти гуногун идома дорад. Бинокорон ният доранд, ки 15-тои онро то ҷашни 20-умин солгарди қабули Конститутсия (Сарқонун)-и ҶТ ба истифода диҳанд. Дар давоми ду даҳсолаи охир бо маблағгузории Ҳукумати кишвар дар вилоят даҳҳо иншооти гуногун мавриди истифода қарор гирифтаанд. Дар назар аст, ки то охири соли ҷорӣ якчанд иншооти дигар, аз ҷумла бинои таваллудхонаи вилоятӣ, қасри варзишӣ, хонаҳои истиқоматии баландошёна, бинои дуюми хобгоҳ барои донишҷӯёни Донишгоҳи давлатии шаҳри Хоруғ ва марказҳои савдо ба истифода дода шаванд. Бо ин мақсад аз ҷониби Ҳукумати кишвар 94,1 миллион сомонӣ ҷудо гардида, ҷараёни корҳои сохтмонӣ таҳти назорати мақомоти иҷроияи ҳокимияти давлатии вилоят қарор дорад. Айни замон дар шаҳри Хоруғ 17 ташкилоти сохтмонӣ бо ҷалби зиёда аз 350 нафар коргар фаъолият дорад.