Ҷаримаи 87 нафар оид ба худсарона буридани дарахтон

Фархор, 8.07.2014. (АМИТ «Ховар», Сулаймон Холов).- Масъулини муассисаи давлатии хоҷагии ҷангали ноҳияи Фархор дар 6 моҳи соли ҷорӣ нисбати 87 нафар оид ба худсарона буридани дарахтон, шикори ҳайвонот ва дигар равандҳои рафтори ғайриқонунӣ нисбат ба хоҷагии ҷангал санад тартиб дода, маблағи 23870 сомонӣ ҷаримабандӣ намуд. Ба гуфти директори муассисаи мазкур Муъмин Ятимов хоҷагӣ дорои 27201 гектар замин буда аз ин шумора 5604 гектараш ҷангалпӯш мебошанд, ки дар он дарахтони писта, бодоми тафдона, санҷид ва дигар дарахтони сояафкану мевадиҳанда парвариш меёбанд. Инчунин гиёҳҳои шифобахш аз қабили испанд , бодоми талхак парвариш ёфта дар ин муддат 1,5 тонна ҷамъоварӣ карда шудааст. Манбаъ афзуд, аз ҷониби муассиса ҳамасола ба муассисаҳои таълимӣ , беморхона, хонаи бачагон ба миқдори муайян ҳезум таъмин карда мешавад. Гуфта мешавад, ки бо мақсади афзоиш додани ҳосили фаровон дар муассиса 11 ҳ 800 бех ниҳолҳои ороиши ва мевадиҳанда парвариш ёфта, шумораи онҳо дар оянда низ афзоиш дода мешавад.