2 нафар Тоҷикистонӣ қурбони садамаи метрои Маскав

Душанбе, 16.07.2014.(АМИТ «Ховар», Мавҷуда Анварӣ).- Имрӯз сафорати Ҷумҳурии Тоҷикистон дар Русия хабар дод, ки дар садамаи метрои Маскав ду шаҳрванди Тоҷикистон курбон шуд. Сардори маркази матбуоти сафорат Муҳаммади Эгамзод гуфт, ки намояндагони сафорат мушаххас карданд, ки аз Тоҷикистон ду нафар Ҳаитов Бӯрӣ Абдуҷалилович, санаи таваллудаш 21 декабри соли 1989 ва Мавлонов Бахтиёр Қурбонович, санаи таваллудаш 17 октябри соли 1989 қурбонии ин фоҷиа гаштанд. Айни ҳол дар беморхонаҳои шаҳри Маскав боз 4 шаҳрванди дигари Тоҷикистон боқӣ мемонанд. Вазъи се нафар Мӯъминшо Муносибшоеви 59 сола, Насимхон Мавлонови 19 сола ва Далер Қурбонови 36 сола вазнин арзёбӣ шудааст.Тибқи иттилои Хадамоти муҳоҷират вазъи Зафарбек Сайфуллоев, ки дар ин садама аз китфаш ҷароҳат бардоштааст, беҳтар ба назар мерасад. Ёдовар мешавем, ки субҳи 15 июл як қатори метрои Маскав дар роҳи байни истгоҳҳои «Славянский булвар» ва «Парк Победи» аз релс берун шуд. Дар натиҷаи ин садама 22 нафар ҳалок ва беш аз 100 тани дигар захмӣ шуданд. Мақомоти Русия мегӯянд, ки дар ин садама ягон далели амали террористӣ мушоҳида намешавад. Имрӯз 16 июл дар пойтахти Русия ба ёди қурбониёни ин фалокат Рӯзи мотам эълон шудааст.