3,5 миллиард сомонӣ барои соҳаҳои иҷтимоӣ

Душанбе, 26.07.2014. (АМИТ «Ховар», Раъно Нусратуллозода).- Имрӯз зимни нишасти матбуотӣ муовини аввали вазири молияи Ҷумҳурии Тоҷикистон Ҷамолиддин Нуралиев зикр намуд, дар нимсолаи аввали соли ҷорӣ барои маблағгузории соҳаҳои иҷтимоӣ аз ҳисоби буҷети давлатӣ зиёда аз 3,5 миллиард сомонӣ равона гардидааст, ки ин зиёда аз 63 фоизи ҳаҷми умумии хароҷоти буҷети давлатиро ташкил дода, дар доираи он маблағгузории музди меҳнат, нафақа, стипендия, ҳама намуди ҷубронпулиҳо ва кумакпулиҳо ба аҳолӣ таъмин карда шудааст. Ҷамолиддин Нуралиев қайд намуд, ки дар давраи сипаригардида барои рушди соҳаҳои иқтисодиёти мамлакат аз ҳисоби Фонди захиравии Президенти Ҷумҳурии Тоҷикистон 11,3 миллион сомонӣ, аз ҳисоби Фонди хароҷоти пешбинишудаи Ҳукумати Ҷумҳурии Тоҷикистон 19,7 миллион сомонӣ ва аз ҳисоби дигар захираҳои буҷетӣ 88,1 миллион сомонӣ, дар маҷмӯъ 119,1 миллион сомонӣ маблағҳои иловагӣ равона гардидааст.