360 хонанда ба лагер фаро гирифта шудаанд

Кӯлоб, 14.07.2014. (АМИТ «Ховар», Сулаймон Холов).- Дар шаҳри Кӯлоб аз ҷониби шуъбаи маориф 360 хонанда ба лагери истироҳатию фароғатии деҳаи Чубеки ноҳияи Муъминобод ба истироҳати тобистона ҷалб гардид, ки айни ҳол хонандагон бо тамоми шароитҳои лозима таъмин мебошанд. Ба қавли сармуҳосиби шуъбаи маориф Абутолиб Юлдошев лагери мазкур шабонарӯзӣ буда, дар се баст фаъолият дошта, давоми 45 рӯз идома меёбад. Дар лагер китобхона, синфи компютерӣ, майдончаи спортӣ, ҳавзи оббозӣ мавҷуд мебошад, ки хонандагон метавонанд мувофиқи реҷаи муайян аз китобҳои бадеӣ ва компютер истифода намоянд. Мавриди зикр аст, ки лагери истироҳатию фароғатӣ дар деҳаи Чубек ҳамасола аз тарафи мақомоти иҷроияи ҳокимияти ш.Кӯлоб роҳандозӣ мегардад, ки дар он беш аз 400 хонанда ба истироҳат фаро гирифта мешаванд.