6 созишнома бо маблағи умумии 53,4 млн. доллари ИМА

Душанбе, 29.07.2014. (АМИТ «Ховар»,Фарзона Достонзода).- Нишасти матбуотӣ оид ба ҷамъбасти фаъолияти Кумитаи давлатии сармоягузорӣ ва идораи амволи давлатии Ҷумҳурии Тоҷикистон дар нимсолаи якуми соли ҷорӣ 29 июл дар Душанбе доир гардид. Тавре, ки ба АМИТ «Ховар» аз Кумитаи сармоягузорӣ иттилоъ доданд, қайд гардид, ки дар нимсолаи аввали соли 2014 ум 6 созишномаи нав бо маблағи умумии 53,4 млн. доллари ИМА ба имзо расонида шуд. Маҷмўи лоиҳаҳо зиёда аз 10 соҳаҳои гуногуни иқтисодиётро дар бар мегиранд. Воридоти сармояи мустақими хориҷӣ нисбат ба ҳамин давраи соли гузашта 27 млн. доллари ИМА ва воридоти дигар намуди сармоягузориҳо ба 66,8 млн. доллари ИМА зиёд шудааст.Дар ин давра, аз ҷумла, созишномаи сармоягузорӣ бо Ширкати «Хели»-и Ҷумҳурии Халқии Хитой дар бораи сохтмон ва ба истифода додани корхонаи коркарди нафт дар Минтақаи озоди иқтисодии «Данғара» бо ҷалби то 500 млн. доллари ИМА, созишномаи сармоягузорӣ байни Ҳукумати Ҷумҳурии Тоҷикистон ва ҶДММ «ККН-РЕГАР» дар бораи сохтмон ва ба истифода додани корхонаи коркарди нафт дар минтақаи саноатии шаҳри Турсунзода, созишномаи сармоягузорӣ бо Ширкати саноати куҳии Тоҷикистону Хитой оид ба коркарди маҷмуии захираҳои кони Зарнисори Шимолӣ (сармоягузорӣ дар ҳаҷми 200 млн. доллари ИМА) ба имзо расиданд.Ба рушди бахши соҳибкорӣ диққати даркорӣ дода шуд. Қарзи имтиёзнок барои соҳибкорон дар ҳаҷми 33 млн. ҷудо карда шуд. Шумораи соҳибкорони ба истеҳсолот машғулбуда афзуд.Дар ин давра 1728 шартномаи иҷораи моликияти коммуналӣ баста шуда, аз ин ҳисоб ба буҷетҳои маҳаллӣ 4,26 млн. сомонӣ маблағ ворид гардидааст, ки ин нисбати ҳамин давраи соли 2013 1,6 млн. сомонӣ зиёд мебошад.Маблағи умумии ба буҷетҳои маҳаллӣ аз ҳисоби хусусигардонӣ ва ба иҷора супоридани моликияти коммуналӣ воридгардида 12,7 млн. сомониро ташкил медиҳад, ки ин нисбати нишондиҳандаи нимсолаи якуми соли 2013-ум 3 млн. сомонӣ зиёд мебошад. Аз ҳисоби хусусигардонӣ ва истифодаи моликияти ҷумҳуриявӣ 15,4 миллион сомонӣ ба буҷети давлат ворид шудааст, ки нисбати иҷрои нақшаи шашмоҳаи соли ҷорӣ 430 ҳазор сомонӣ зиёд мебошад.