746 нафар маҳбус гирифтори бемории силу ВНМБ мебошад

Душанбе, 10.07.2014. (АМИТ «Ховар», Мавҷуда Анварӣ). -Дар зиндонҳои Тоҷикистон беш аз 746 нафар гирифтори бемории силу ВНМБ мебошанд, гуфт Нусратулло Файзулло вазири тандурустӣ ва ҳифзи иҷтимоии аҳолӣ дар нишасти матбуотӣ ба хабарнигорони ВАО. Вазири тандурустӣ афзуд, ки ин маҳбусон дар назорати духтурон қарор доранд, аммо будани беморони сил дар зиндонҳо боиси сироятёбии дигар зиндониҳо мешавад. Ӯ илова намуд, ки соли 2013 Беморхонаи марказии зиддисилӣ барои 100 нафар мавриди истифода қарор дода шуд, ки барои гирифтани табобат тамоми шароити ташхисӣ фароҳам аст. Хабарнигорон дар бораи ба ҳалокат расидани маҳбуси гирифтори бемории сил дар зиндони шаҳри Қурғонтеппа ба Н. Файзулло суолҳо пешниҳод намуданд. Вазир аз ин қазия изҳори нигаронӣ карда, гуфт ки тамоми сохтори тиббӣ дар Вазорати адлия ҳаст ва мо бо онҳо ҳамкории зич дорем. Ин маҳбас бояд дар марказҳои махсуси табобати сил ба муолиҷа фаро гирифта мешуд. Аммо бо сабабҳои номаълум бо гуноҳи табиб ё нафарони масъул ӯро ба ҷои лозима равон накарданд.